Sab kahaan kuchh lala-o-gul mein numaayaan ho gayin
Khaak mein kya sooratein hongi ke pinhaan ho gayin
Yaad thiin ham ko bhi rangaa-rang bazm-aaraaiyaan
Lekin ab naqsh-o-nigaar-e-taaq-e-nisyaan ho gayin
Thiin banaat-un-na'sh-e-gardoon din ko parde mein nihaan
Shab ko un ke ji mein kya aai ke uryaan ho gayin
Qaid mein Ya'qoob ne li go na Yoosuf ki khabar
Lekin aankhein rauzan-e-deewaar-e-zindaan ho gayin
Sab raqeebo'n se hoon na-khush par zanaan-e-Misr se
Hai Zulaikha khush ke mahv-e-maah-e-Kan'aan ho gayin
Joo-e-khoon aankho'n se behne do ke hai shaam-e-firaaq
Main ye samjhoon ga ke sham'ein do farozaan ho gayin
In pari-zaado'n se lenge khuld mein ham intiqam
Qudrat-e-haq se yahi hoorein agar vaan ho gayin
Neend us ki hai dimaagh us ka hai raatein us ki hain
Teri zulfein jis ke baazu par pareshaan ho gayin
Main chaman mein kya gaya goya dabistaan khul gaya
Bulbulein sun kar mere naale ghazal-khvaan ho gayin
Wo nigaahein kyun hui jaati hain ya-rab dil ke paar
Jo meri kotaahi-e-qismat se mizhgaan ho gayin
Bas ke roka main ne aur seene mein ubhriin pai-ba-pai
Meri aahein bakhiya-e-chaak-e-garebaan ho gayin
Vaan gaya bhi main to un ki gaaliyo'n ka kya jawaab
Yaad thiin jitni duaayein sarf-e-darbaan ho gayin
Jaan-fiza hai baada jis ke haath mein jaam aa gaya
Sab lakeerein haath ki goya rag-e-jaan ho gayin
Ham muvahhid hain hamaara kesh hai tark-e-rusoom
Millatein jab mit gayin ajzaa-e-eemaan ho gayin
Ranj se khugar hua insaan to mit jaata hai ranj
Mushkilein mujh par padeen itni ke aasaan ho gayin
Yun hi gar rota raha Ghalib to aye ahl-e-jahaan
Dekhna in bastiyo'n ko tum ke veeraan ho gayin
سب کہاں کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں
یاد تھیں ہم کو بھی رنگا رنگ بزم آرائیاں
لیکن اب نقش و نگار طاق نسیاں ہو گئیں
تھیں بنات النعش گردوں دن کو پردے میں نہاں
شب کو ان کے جی میں کیا آئی کہ عریاں ہو گئیں
قید میں یعقوب نے لی گو نہ یوسف کی خبر
لیکن آنکھیں روزن دیوار زنداں ہو گئیں
سب رقیبوں سے ہوں نا خوش پر زنان مصر سے
ہے زلیخا خوش کہ محو ماہ کنعاں ہو گئیں
جوئے خوں آنکھوں سے بہنے دو کہ ہے شام فراق
میں یہ سمجھوں گا کہ شمعیں دو فروزاں ہو گئیں
ان پری زادوں سے لیں گے خلد میں ہم انتقام
قدرت حق سے یہی حوریں اگر واں ہو گئیں
نیند اس کی ہے دماغ اس کا ہے راتیں اس کی ہیں
تیری زلفیں جس کے بازو پر پریشاں ہو گئیں
میں چمن میں کیا گیا گویا دبستاں کھل گیا
بلبلیں سن کر مرے نالے غزل خواں ہو گئیں
وہ نگاہیں کیوں ہوئی جاتی ہیں یارب دل کے پار
جو مری کوتاہیٔ قسمت سے مژگاں ہو گئیں
بسکہ روکا میں نے اور سینے میں ابھریں پے بہ پے
میری آہیں بخیۂ چاک گریباں ہو گئیں
واں گیا بھی میں تو ان کی گالیوں کا کیا جواب
یاد تھیں جتنی دعائیں صرف درباں ہو گئیں
جاں فزا ہے بادہ جس کے ہاتھ میں جام آ گیا
سب لکیریں ہاتھ کی گویا رگ جاں ہو گئیں
ہم موحد ہیں ہمارا کیش ہے ترک رسوم
ملتیں جب مٹ گئیں اجزائے ایماں ہو گئیں
رنج سے خوگر ہوا انساں تو مٹ جاتا ہے رنج
مشکلیں مجھ پر پڑیں اتنی کہ آساں ہو گئیں
یوں ہی گر روتا رہا غالبؔ تو اے اہل جہاں
دیکھنا ان بستیوں کو تم کہ ویراں ہو گئیں
सब कहां कुछ लाला-ओ-गुल में नुमायां हो गईं
ख़ाक में क्या सूरतें होंगी कि पिन्हां हो गईं
याद थीं हम को भी रंगा-रंग बज़्म-आराइयां
लेकिन अब नक़्श-ओ-निगार-ए-ताक़-ए-निस्यां हो गईं
थीं बनात-उन-नश-ए-गर्दूं दिन को पर्दे में निहां
शब को उन के जी में क्या आई कि उर्यां हो गईं
क़ैद में याक़ूब ने ली गो न यूसुफ़ की ख़बर
लेकिन आंखें रौज़न-ए-दीवार-ए-ज़िंदां हो गईं
सब रक़ीबों से हूं नाख़ुश पर ज़नान-ए-मिस्र से
है ज़ुलैख़ा ख़ुश कि महव-ए-माह-ए-कनआं हो गईं
जू-ए-ख़ूं आंखों से बहने दो कि है शाम-ए-फ़िराक़
मैं ये समझूंगा कि शम्में दो फ़रोज़ां हो गईं
इन परी-ज़ादों से लेंगे ख़ुल्द में हम इंतिक़ाम
क़ुदरत-ए-हक़ से यही हूरें अगर वां हो गईं
नींद उस की है दिमाग़ उस का है रातें उस की हैं
तिरी ज़ुल्फ़ें जिस के बाज़ू पर परेशां हो गईं
मैं चमन में क्या गया गोया दबिस्तां खुल गया
बुलबुलें सुन कर मिरे नाले ग़ज़ल-ख़्वां हो गईं
वो निगाहें क्यों हुई जाती हैं या-रब दिल के पार
जो मिरी कोताही-ए-क़िस्मत से मिज़गां हो गईं
बसकि रोका मैं ने और सीने में उभरीं पै-ब-पै
मिरी आहें बख़िया-ए-चाक-ए-गरीबां हो गईं
वां गया भी मैं तो उन की गालियों का क्या जवाब
याद थीं जितनी दुआएं सर्फ़-ए-दरबां हो गईं
जां-फ़िज़ा है बादा जिस के हाथ में जाम आ गया
सब लकीरें हाथ की गोया रग-ए-जां हो गईं
हम मुवहहिद हैं हमारा केश है तर्क-ए-रुसूम
मिल्लतें जब मिट गईं अजज़ा-ए-ईमां हो गईं
रंज से ख़ूगर हुआ इंसां तो मिट जाता है रंज
मुश्किलें मुझ पर पड़ीं इतनी कि आसां हो गईं
यूं ही गर रोता रहा ग़ालिब तो ऐ अहल-ए-जहां
देखना इन बस्तियों को तुम कि वीरां हो गईं
Mirza Ghalib